蚼蟻報恩

有一工，好天好耀，日頭赤炎炎（chhiah-iāⁿ-iāⁿ）。一隻蚼蟻仔腹肚枵ah，來遘溪仔墘討食。臨當時（liâm-tong-sî），一陣風吹來，蚼蟻仔一下無細膩（sòe-jī），soah去互風卷落溪仔底。

“救儂哦，救儂哦～～”蚼蟻仔跋落水了後，ná pê水 ná喝救儂。

樹仔頂有一隻粉鳥拄仔好看見著。“可憐代，我一定噯想辦法kā伊救起來！”粉鳥一時有主意，趕緊銜（kâⁿ）一張樹箬仔飛來遘溪仔邊，將樹箬仔tàn落去溪中央。

蚼蟻仔真緊著peh起哩樹箬仔頂，chiah無去互水淹死。“好佳哉粉烏仔好心鬥相共（tàu-saⁿ-kāng），ah nā無即擺我性命無去。”蚼蟻仔受儂的救命恩情，自安呢永遠to記牢牢（kì-tiâu-tiâu），呣敢放bōe記。

有一工早起時，粉鳥歇佇樹oe頂懸，當咧筅毛化妝。一个背（phāiⁿ）鳥銃的獵儂遠遠仔看見著，著攑銃瞄準粉鳥，按算beh kā彈落來配燒酒。粉鳥kan-ta顧筅毛，目降降，攏呣知影災厄（chai-eh）liâm-mi著beh來ah。

蚼蟻仔佇塗跤下看著即个情形，趕緊大聲kā粉鳥仔喝講：“粉鳥兄啊，緊走哦！緊走哦！”雖然嚷kah嚨喉（nâ-âu）強卜sau聲，iah呣佫，樹叢siuⁿ懸，粉鳥仔猶原無聽著。

蚼蟻仔真正食急，雄雄有主意，伊緊緊趖起哩獵儂的跤盤兮，喙仔拆開，相著獵儂倒跤大頭拇大力giat落去。獵儂疼一下搐搐叫（tiuh-tiuh-kiò），銃子拍kah歪歪去。

粉鳥仔一條命抾（khioh）倒轉來，伊飛來歇滯蚼蟻仔的身軀邊kā伊說多謝。蚼蟻仔講：“三八呣chiah安呢！敢講汝bōe記得ah，頂擺我跋落水，nā呣是汝救我，我早著去蘇州賣鴨卵ah。”