本站頂日頭仔有報導台灣行政院當咧制訂「國家語言發展法」草案，按算將現子時台灣境內所有的自然語言攏總chhiâu平大，互in攏通成做「國家語言」（詳細情形請看《閩南語有可能成做台灣「國家語言」》）。即條消息自《聯合報》登出來了後，凡勢引發台灣社會各界人士無共款的解讀。下面來報導「台灣**社」成員張復聚先生最近發表佇《自由時報》「自由廣場」的一篇文章，題目號做《從國家語言到官方語言》，因為這原文是用華文寫的， 咱taⁿ卜來共伊翻譯做閩南文。



 《按國家語言遘官方語言》

行政院決定卜推動「國家語言發展法」，承認所有台灣本土語言攏是國家語言，soah互台灣儂感覺ná像強卜出頭天的款！

是講，行政院雖然決定卜推動「國家語言發展法」，承認所有台灣本土語言攏是國家語言（National Languages），呣佫soah無按算卜討論官方語言（Official Languages）。論真講啦，這國家語言只不過是咧承認各種語言地位平等，講咔歹聽的，he攏政治性的口號niâ，講過giàn的niâ，無算真真正正的尊重。聯合國taⁿ已經將咱國的幾落種母語，算做是強卜死絕（sí-che̍h）去的語言。卜安怎來挽救咧？學術界認為講：語言傳湠（thn̂g-thoàⁿ）佮發展，一定噯有文字化、標準化佮現代化，佫來，上無佫著噯有75％的族人積極來使用！台灣政府nā真正卜尊重台灣儂、真正卜寶惜台灣語言文化、真正卜落實聯合國語言佮文化政策，著應該結合每一个所在的地方特色，順紲討論制訂合適的官方語言，比論講，佇阿美族（Amis）地區嘛會當共阿美族語當做官方語言，共伊用佇咧各種官方文書當中，互阿美族語通有機會復活佮發展起來，這chiah是正港號做現代、文明、本土佫有世界觀的台灣政府！威爾斯的做法佮經驗值得參考。當然，保留全國通用語言佮教育國際語言嘛真要緊。

本儂佇遮提出一寡具體的建議：

一、即時佇全國範圍內調查母語使用的狀況。

二、栽培母語教師︰根據語言使用調查的結果，確定母語教師的數量，用心來kā栽培。

三、編輯出版教材佮課外冊，包括各種專用辭典（科技、法律、醫學、藝術等等）。

四、適當增加母語教學的時數，將母語成績列入考核，抑是講做為升學考試加分的根據。

五、拼雙語教育，用母語來做教學語言。

六、冗早（liōng-tsá）來做羅馬字的教學，提懸教學效率。

七、各級政府機關佮學校噯制定母語服務計畫。

八、鼓勵有發展性的母語教育，用三十年的時間，將母語提升遘官方語言的級聲。

自由廣場登出即篇文章了後，佇即時民調當中會當知影，有 tih-beh 87.5%的儂表示支持。