——閩南語、客語將同列國家語言

台灣聯合報2007年3月20消息報導：
  
台灣行政院制訂「國家語言發展法」草案，將卜去除「國語」、「方言」的概念，明確確定本國族群或者地方佇咧使用的自然語言（包括閩南語、原住民語等等），攏總是國家語言，國民有權使用，禁止歧視。佇即款情形之下， 「國語」佮「方言」的講法，將會成做歷史名詞。

台灣行政院即陣已經完成對即項草案的審查，近期內將會提送行政院會做討論。根據了解，台灣行政院長蘇貞昌佇舊年捌講過，語言的推動，應該噯用自然佮鼓勵的方式來運作，互各族群的儂來尊重各種語言；伊反對利用公權力、壓力或者是其它的資源佇咧推動國家語言。聽咧講，制訂即个法案本成著是陳水扁（現任台灣總統，民進黨）佇咧2000年競選總統的時陣提出來的一項重要政治主張，往過台灣教育部佮文建會嘛捌推動國家語言發展法，將台語（閩南語，漳泉）佮客語（客家話）共伊列做主要的官方語言，當時因為安呢引發著社會各界一場的紛會。



台灣行政院即擺草擬（chhó-gí）的法案，乾凋（kan-ta）十个條文，是採用概念佮原則性佇咧立法，主要目的著是卜消除「國語」佮「方言」的概念。

台灣行政院的官員講，未來呣管是所謂的國語、北京話、閩南語、客家話、原住民語……橫直即陣所有（台灣）人民使用的語言佮地方使用的自然語言攏是國家語言。講遘外界有佇咧紛會的「官方語言」佮「文字」的問題，台灣行政院即遍是采取分開看待、分開處理，避免去惹著自底著有夠敏感的族群議題。

草案也強調語言的傳湠（thn̂g-thoàⁿ）佮振興，明定政府著辦理國家語言的保存、傳湠、學習佮研究；對著有傳承危機的國家語言著制訂「國家語言復振計畫」。為卜確保國民享有使用國家語言、接受政府服務佮利用公共資源的權利，政府機關噯提供播音、諮詢、通譯、會議口譯佮手語等等的必要設施。

消息源頭：【2007/03/20 聯合報】@ http://udn.com/