2007年1月9號，《廈門晚報》發表一篇佮調查訪談有關聯的報道，本站摘錄中間的一小部分，翻做閩南語，儂客來看māi……

廈門松柏中學（Ē-mn̂g Siông-pek Tiong-o̍h）高二年級的諸姥（cha-bó·）學生黃瑜（N̂g Jû）用去4月日的時間，對廈門市中學生使用閩南語的狀況做一个調查。無偌久進前，黃瑜將伊調查的結果發表出來，引起社會各界紛會，十喙九尻川（kha-chhng），意見是一儂一樣，無儂親像。

學生囡仔黃瑜是佇咧兩位學堂（o̍h-tn̂g）先生林亨生（Lîm heng-seng）佮戴永萍（Tè éng-phiô）的指導下，對一部分佇學堂讀冊的閩南籍同學做問卷調查。伊攏總發出268張問卷，收轉來235張。調查發現講：真儕學生囡仔對著閩南語自底有的語詞愈來愈生份，有的攏全聽無。比論講，大多數接受訪問的學生囡仔，呣知影“浪費”即个词闽南话噯講做“phah-sńg”，kan-ta會曉照普通話的講法硬翻落來。一寡閩南在地的俗語話、成語，佫咔是bōe曉了了；大部分儂攏全呣知影hiah-ê俗語話到底啥物意思。

黃瑜伊感覺講，即款狀況實在真害，應該著噯趕緊來轉變，伊講即陣真正是“火燒鼎臍”的坎站囉。

調查顯示講，接受採訪的閩南籍學生，咔加80%的儂會曉聽、會曉講閩南話。不而過，猶原有10%的儂kan-ta會曉一寡真普通真普通的日常用語；ah佫有4.4%的學生攏bōe曉講，嘛bōe曉聽。這掠外，有將近卜10%的在校生從來（chêng-lâi）呣捌講閩南話；同學拄同學，定定講閩南話的儂kan-ta佔15.8%；七成咔加的受訪者三不五時講一半句仔閩南話。

接受調查的學生，虽然猶佫有卜倚六成的儂佇厝兮講閩南話，不而過大部分kan-ta會曉一寡真普通的日常用語。另外38.6%的學生kan-ta講普通話niā。大部分家長主張講，定定講閩南話，別日囡仔講普通話會講bōe準（bōe標準），會有在地腔，所以家長無願意互囡仔講閩南話，連滯咧厝兮嘛呣准in講閩南話。著是安呢，chiah致遘（tì-kàu）愈來愈儕的在地囡仔bōe曉聽俗語話、古早話。

ps.有牽聯的：

《百年後，閩南語亡去》