前兩日仔，台灣流行歌詞曲創作人黃仁清先生（捌寫過新年名曲《財神遘（財神到）》）來佇廈門訪問，為伊的新專輯《豬年肥年》做宣傳。伊講，除去宣傳新作，佫卜借著佮廈門衛視《閩南行透透》（欄目）合作的機會，佇閩南所在收幾个仔 司仔（sai-á）。
黃仁清老先生，今年70幾啊，chêng早前 著 不止 有名聲，伊thèng講是頂世紀六七十年代tiàm台灣流行歌壇 hoah水會堅凍 的 排子儂（pâi-chí-lâng），算講是siǎn-pái to̍h tio̍h ah。真儕大牌的明星（miâ-chhiⁿ）攏捌kiau黃老先生合作過，汝像講鄧麗君啦、龍飄飄啦、江蕙啦……實在講bōe息了（bōe-sit-liáu）。
《財神遘》（財神到）即條歌，是黃老先生佇30外年前寫的，算講佮過新年有關係的流行歌，hit當時有影是chhèng kah 掠 bōe tiâu，頂港下港 通儂知。龍飄飄著是好氣運去唱著即條，呣chiah hām伊嘛做一下chhèng起來。黃老先生講，hit陣咔無儂看重新年歌，所以伊chiah會想講卜來做一寡佮別儂無共款的物件……伊講he是真心適的代誌。
黃老先生即擺做的即tè曲盤，號做《豬年肥年》，照原是新年賀喜的主題，討一个好吉兆。即盤所收的歌，全部攏總是伊本儂寫的，佫專工邀請幾落个台灣有名的藝人出來唱。
黃老先生講，現子時，伊感覺上要緊的代誌，著是噯趕緊chhē機會佮中國即爿合作，牽成一寡閩南語歌壇的新儂。黃老先生講伊寫閩南語歌20捅年啊，台灣大多數唱閩南語歌的，攏有chhē伊合作過。即chōa來廈門，嘛有按算講趁著佮廈門衛視合作的機會，通來牽成一半个仔閩南在地的少年儂。伊講，即陣的新儂，的確噯有真讚的生活理念佇咧，呣nā噯會曉唱歌（gâu唱歌），佫噯有智識有文化，兩項攏bōe-ēng-tit重頭輕。黃老先生認為講卜做一个成功的歌手，上起碼噯有兼备“聲、色、藝”即三項素質。伊講，此去nā卜來推捒（tu-sak）新式閩南語歌，定著噯加栽培一寡生做咔嫣、咔súi的少年家仔出來唱，“三分儂才，七分本事”，安呢閩南語歌chiah會當佮儂有比並（pí-phēng），chiah會當徛在。
(0)
