鹭水芗南-闽南语部落

          一个从来呣捌见过面的网友问我讲“捌伫外口 偷食chho 呣捌？”我对喙共伊应讲“若汝无算的来讲，应该是无啦。”伊知影我咧佮伊讲爽笑①，随共我应讲，”无 上好啦，咔清火，咔免气努②”……停唸咪仔，伊又佫对我讲“汝讲来听看māi咧，汝是安怎看待婚外恋咧？”我看伊凡势兴兴，choǎⁿ陪伊讲sòa落去。我讲——

“婚姻可比是睏眠，婚外恋可比是ná睏ná眠梦。nā咔好斗的，凡势是一场美梦；咔歹手尾的，注定着是一场的恶梦。”

“先结婚，尾仔离缘，这可比是半暝精神；nā佫再结，着bōe输 精神了后佫睏去，继续做眠梦；单身可比是规暝无眠……”

閒閒無代誌，佇咧網頂一四界(sì-kòe) loa̍h-loa̍h-sô，注死（湊拄巧 / 湊拄坎）去chhiau著一篇刊登佇《泉州晚報》（海外版>>風情）的文章，題目號做《泉州上元丸》。斟酌(chim-chiok) kā看咧，夭壽，佫是用閩南語（泉州）白話文寫ê neh！Taⁿ真正精神來啊，目睭嘛做一下金起來。這敢精實（chiaⁿ-si̍t）ê？我實在有淡薄仔呣敢相信家己ê目睭。É，遮中國neh！正港大間報社neh！有影 無簡單……

我真正有好玄，一睏頭 讀遘煞。雖然講，作者佇文中透濫著誠儕「華語」ê成分，總是，罕罕有趣味。拈(ni)來互逐个bāi一下——

(閱讀全文)

    人生在世久長長，總有真儕代誌互儂「想bōe遘」，有時「歡喜一下」，有時soah「驚一趒」。天災人禍，想bōe遘；得著橫財，嘛想bōe遘。愛因斯坦IQ第一懸（koâiⁿ），伊遘死嘛想bōe遘數十年後會有internet……
     十幾年前，大概無儂知影啥物是”Blog”。
     Blog的出現，改變的大概呣干凋是歷史。

     往過，若講作文寫字，真儕儂往往是『攑筆鋤頭重』。從(chêng)有blog了後，會安呢想的儂，會用講是愈來愈少啊。
     憖(giàn) beh寫啥著寫啥，想beh安怎寫著安怎寫……

(閱讀全文)

◎阿天（美國）

〖踏話頭〗網路無邊無界，無分國界。透過網路，互咱熟似著儕儕天涯海角的朋友，因為共款的興趣，逐个才通行相倚。下面是一位蹛佇美國的朋友——阿天（aThinn）所寫的文——《數念兩尾中國活龍》。經過 阿天兄 本人 tàm頭 同意了後，taⁿ刊出來互眾網友做夥分享——

（講古場，相招來寫母語文。遊戲規則：[1]、[2]）

第1葩：Phīⁿ 著露水兮香味，擱行差不多一百公尺著是山頭囉……

第2葩：電腦銀幕 ta̍uh-ta̍uh-á hoa–去，tńg烏金ê銀幕浮出一個人面ê影，未從明iu-koh tiuh 一下變 DVD 選單……

第3葩：

隔轉工，拄好是禮拜日。一透早，天 拄 拍phú光，Jenny著出門囉，hit時，阿嬤佮小弟仔阿泉猶咧睏。伊出門無愛騎機車，伊感覺踏 骹踏車加真活動、加真快活。將軍山離怹厝呣是真遠，大概過咔無三字久，Jenny著來遘了山骹。雖然天猶未光，路頂的過路人soah那來那儕。Jenn y坫(tiàm)停車場將骹踏車pha好勢，越頭拄beh行過路口的時，好朋友Rose嘛遘啊。
「Rose，恁姊仔哪會無佮汝來？昨昏呣是講好beh做陣去？」Jenny看Rose家己一个，開喙就問伊。
「阮姊喔…有好空的咧等伊。」Rose假做誠神秘的款。
「啥物好空的？講來聽看māi」Jenny牽著Rose的手，那行那問。兩个手牽手，順著 石khat仔ta̍uh-ta̍uh-á行按山頂去。
「攏嘛阮阿姨啦，無代無誌講beh chhōa阮姊去市內看啥物『帥哥』…哼，碗糕啦，『帥哥』….」Rose講煞，喙角仔猶原khiau-khiau。
「Beh去看親chiâⁿ的款哦～？是叨一个『帥哥』咧？」Jenny感覺誠好玄。
「拜託ê，人 即擺 攏嘛 講hit-lō『相親』～～叨一个『帥哥』哦，歹勢，我oân-á呣知…」
「恁姊有福氣哦！……啊，Rose，咱遘山頂啊neh!!」
「哇～足媠，足媠的！Jenny，汝看頭前，hit chōa雲，紅記記 佫 烏khâm-khâm，若(ná)火，若樹林，若火焰山，媠kah……」
「哇～～日頭beh出來啊！」
「緊的，緊的，相機緊iam出來……」
……
正是——

(閱讀全文)

　　往早，方興東是 中國網路評論界 真正 有名的排祉人（pâi-chí-lâng）。最近即兩三年來，是伊互「博客」（blog）即个詞變kah真時行，變kah愈來愈樸實(phoh- si̍t)。即chām，即位互人叫做「中國博客教父」的少年人，又佫再咧製造另一場大規模的blog推廣運動。伊的目標是兩年後網民攏有家己的部落閣 *，的確是beh互部落閣按「貴氣」成做「普通」。

　　部落閣不再是「gâu人」、「排祉人」的專利

　　「拄頭仔，thit-thô部落閣的，攏是一寡網路英才，這算是（部落閣發展史）第一个階段；sòa落來第二階段著開始出現誠儕愛趁時行的 blogger，怹透底咔看重blogging所帶來的趣味性；第三階段，咔主要的腳數（kioh-siàu），猶原是早前的hit-phâng人，現白 講，怹攏是一寡仔實用主義者，認為blogging會當kā怹 扎來 真儕的利益；第四階段來講，是hiah-ê咔晚(bńg)動手的blogger，chiah-ê人透底是看著儕儕人寫，『鴨仔趁sōng』、『攑香tòe 拜』， 才想beh來趁人寫的。」

(閱讀全文)

漳泉俗语講，「七十三，八十四，阎羅免叫家己去」。這是咧共儂講，儂若食老著無路駛、無作用囉，講一句咔歹聽的，叫做「蕩死的」（tōng-sí–ê/ 等死好niā）。所以，佇咱的印象内底，透底認為講，老大儂不但對社會無所貢獻，颠倒佫會增加社會的負擔。不而过，即句话有時仔無一定講定定(tiāⁿ- tiāⁿ)正確。特别是現子時，社會加诚進步，生產力比往早時加誠發逹，各行各業拢需要有一定技能技巧的人才。會使講，一个儂的技能若愈突出，著愈受歡 迎。儂講「老的老步定，少年的倒táng-hiáⁿ」，老大儂的生活經驗往往比少年儂咔豊富；in 所掌握的技能技巧嘛往往比少年儂加咔儕、加咔讚。「棺材贮(té)死無贮老」，老大儂，只卜若呣是老kah拢無法度振動(tín-tāng)，猶原嘛是會 當對社會有所貢獻。

講起范壽春老先生，誠儕廈門的在儂hoān勢to會知，瞭解伊是本地有名的「講古仙」。老先生今年七十七，講古是伊即世儂上主要的職業。老先生出世佇鼓浪 嶼，自細漢，伊to̍h合意著「講古」即途，拄開始是坫「講古場」聽儂講，聽久ná興(hèng)、ná綿精(mî-chiⁿ)，有時lak袋若無錢，著 走去覕滯(bih-tòa)壁角仔偷聽（往早時，講古是一種行業，卜聽講古噯開小錢）。根據老先生伊家己咧介紹講，伊做囡仔的時代（量其約佇頂世紀三、四 十年代），全廈門拢總差不多有十外位專業的講古場。往过的講古，透底講一些「中國歴史故事」佮「民間傳奇」，比論：《水浒傳》、《羅通掃北》、《包公 案》、《施公案》、《三國演義》、《封神演義》等等。儂講「一年新婦，两年師傅」，久，自然著會出師。尾仔，范先生家己oân仔行入「講古」即途，並且一 下開喙著是一世儂。伊出世佇舊社會，自少年，伊著亲身佮下階層的做工仔儂來做交陪。伊瞭解身軀邊hiah-ê勞動大眾的心聲佮艱難，知影in 咧想啥，beh-ti̍h啥。當然，遮个經歴，拢成做當時范老講古的能源佮動力。

(閱讀全文)