ＴＷＫＩＤ>>台灣．囡仔 的主儂（girl 哦~~）佇伊的BLOG内底寫講：
下昏去買宵夜卜食，和(hām)頭家娘攏總有三ê儂tī遐塊開講。
in有時–啊講台語，有時–啊講華語，擱m̄是華語濫tī台語內底講，是規ê用華語，有時規ê用台語。
聽會出in是講台語來大漢ê，我企tī遐聽，感覺足奇怪。
著哪親像有時khiā tī台北街頭，看著两ê明明是台灣儂ê儂，soah攏用英語咧對談？
這ê國家，真正有奇怪。
莫怪頂擺林俊育先生真慼心(chheh-sim)塊講：「咱tī台灣，教台語講也會上新聞？恁看安呢有奇怪無？」……
這敢真正有算奇怪？朋友，准講汝是一个拄拄來遘的美國儂，看著即款情形，汝稳當會講奇怪；汝是法國儂、香港儂，汝共款會講奇怪。不而过，汝若是在地一个普通的中國儂，抑是普通的台湾儂，汝hoān勢著會講”根本無啥通好奇怪”，上無嘛會認為he “無算kài 奇怪”。
本然，台灣光復了後，日本仔互儂戽出去的時，漳泉語應該是有法度chhèng起來chiah著，准講國民黨莫(bo̍h)去台湾kô-kô缠，kiám-chhái今仔日漳泉話已經成做台湾的官方语言（可比講，廣東话成做香港佮澳门的官方語言）。不而过，照目前的來看，台湾儂的母語應該是永遠失去即款好機會ah.
佇漢語系眾方言（包括闽、客、粤、吴、北方、湘……等等）當中，設使in 永遠無度法成做一个所在（抑是講一个国家）的官方语言，若安呢，等待in 的，只有两个字：死亡。互in 死去的凶手，呣是别儂，正正著是迄个佮in 共父各母的親兄寶弟——北仔話（普通话/華语）。即款“強食弱”、“食遘遘”的凄慘代，早早著已經是一種趋勢，互咱感覺加真無奈、又佫無法度阻擋的趋勢。咔悲觀的來講，這绝對呣是三五十冬著會當改變的状況。
人口比例佔去一半咔加的台湾福佬儂，设使無法度佇此去即段時间内底，互漳泉話成做在地的官方语言，我看…漳泉話佇遐真紧著卟遘冬ah…..
(0)
